کریم بېنزیما د ریکارډ جوړولو تر څنګ په ریال بازي هم وګټل. ریال ماډریډ د لالیګا په (۲۹مه) اونۍ کي د (هوویسکا) سره لوبه درلودل، چي د بېنزیما په ګول ئې په (۸۹یمه) دقیقه کي وګټل. دا لوبه چي تر هغه وخته ۲ پر ۲ مساوي وه، خو بېنزیما په اساس وخت کي ګول ولګوی او د لوبي ګټلو تر څنګ تر (هوګو سانچیز) را وروسته د لالیګا د تاریخ یوازینی لوبغاړی سو، چي پر ټولو هغو لوبډلو ئې ګول لګولی دئ، چي ور سره مخ سوی دئ. کریم بېنزیما لس کاله دمخه ریال ته راغلی او د هغه راهیسي د (۳۴) کلبونو سره لوبېدلی دئ، چي پر ټولو ئې ګولونه لګولي دي، چي دا ریکارډ نه رونالډو او نه مېسي جوړ کړی دئ. لیونل مېسي د بارسلونا سره په لالیګا کي د (۴۰) لوبډلو سره مخ سوی دئ او پر (۳۷) ئې ګول لګولی دئ، یوازي ئې پر (هوویسکا، مورشیا او کاډیز) ګول نه دئ لګولی او کریسټیانو رونالډو د (۳۳) لوبډلو سره په ریال کي مخامخ سوی دئ او پر (۳۲) ئې ګول لګولی دئ، یوازینی لوبډله (لیګانیز) وه، چي رونالډو ګول نه دئ پر لګولی. د یادوني وړ ده، چي کریم بېنزیما د فرانسې مسلمان لوبغاړی دئ، خو په ملي لوبډله کي د هغوی د روزونکي ډیشامپس له خوا د نامعلومه دلیل په خاطر نه اخیستل کیږي.
