امریکا په صراحت وايي چي د نظامي عملیاتو هدف يې پر طالبانو باندي فشار اچول دي. په مقابل کي، طالبانو هم د جنګ منطق غوره کړی دی، ځکه هغوي غواړي چي امریکا ته دا وښيي چي نظامي فشار به يې و نه ډاروي.

دا چي امریکا غواړي چي د ملکي کسانو په وژلو سره دایمي سوله راولي، دا یو غیر واقعبینانه عمل دی. د ملکي کسانو وژل د بین المللي قوانینو څخه څرګنده سرغړونه ده. د ملکي کسانو د وژلو لپاره دا هم موجه دلیل نه سي کېدلای چي طالبان د ملکي کسانو څخه د ډال په توګه استفاده کوي. په همدې لړ کي، افغان امنیتي قواوي نه د ملکي افغانانو د ساتلو اراده لري، او نه هم پوهېږي چي څرنګه دا کار وکړي.

د سولي لپاره د افغانانو تنده ژوره او واقعي ده. خو افغانان دا هم غواړي چي د سولي په پروسه کي يې بشري او مدني حقوقو پایماله نه سي. او د ښځو حقوق خوندي وي.

افغان حکومتي مشران او د هغوی جنګسالاران ملګري د بشر د حقوقو په برخه کي بد ریکاد او سابقه لري. هغوی زیاتره د خپل قدرت د ساتلو په غم کي دی، نه د خپل هیواد د پرمختګونو د ساتلو. ځکه د افغانستان اوسني پرمختګونه د هغوی د ارادې په خاطر ندي راغلي،‌ بلکي د هغوې د نیت پر خلاف رامینځته سوي دي.

نو لهذا، د امریکا دا اوږد جنګ ختمول ضروري خبره ده، خو داسي معامله باید و نه سي چي تر ګټي يې تاوان زیات وي. ځکه د عجلې یوه داسي معامله چي سمدستي ړنګه سي او زیان يې ډېر وي، ښايي نه معامله پر بهتره وي.