اېم اېس دهوني یو وار بیا خپل کلب ته لوبه ور وګټل. په اېنډيين پرېمييرلیګ یا IPL کي (۱۲مه) لوبه د دهوني د کلب (چینای سوپر کینګز) او (راجیستان رویالز) تر مینځ وه، چي د (۸) منډو په توپير چینای د دهوني د ښه مشرۍ او ښه بېټینګ په زور وګټل. په دې لوبه کي اول بېټینګ چینای لوبغاړو وکی او په شل آوره کې د (۵) ویکیټو په بایللو سره راجیستان لوبغاړو ته (۱۷۶) هدف ورکئ، چي دهوني (۷۵) منډي وکړلې او اوټ هم نه سو، نو ځکه د لوبي غوره لوبغاړی وټاکل سو. کله چي د راجیستان لوبغاړي بېټینګ ته راغلل، نو ورکړل سوی هدف ئې پوره نه کئ، ځکه دوی په شل آوره کي د (۸) ویکیټو په بایللو سره (۱۶۸) منډي وکړلې او لوبه ئې د (۸) منډو په توپير پر چینای بایلل. د دوی په لوبغاړو کي (بېن سټوکس ۴۶) منډي وکړلې او د چینای څلورو بالرانو (دیپک چاهار، شاردول ټاکور، عمران طاهر او ډوېن براوو) دوه دوه ویکیټه واخیستل. د یادوني وړ ده، چي چینای سوپر کینګز تر ۳ لوبو وروسته اوس د جدول په اول مقام کي (۶) نمرې لري او راجیستان لوبډله په اخیر مقام کي صفر نمرې.