البته حقیقت دا دی چي امریکايي مطبوعاتو، په تېره بیا واشنګټن ټایمز، د رحماني خبري نه دي تحریف کړي،‌ بلکي آلان رویا رحماني خپله لګیا ده خپلي پخوانۍ څرګندوني پخپله تحریفوي.

سفیري رویا رحماني ویلي ول،«د افغان حکومت باور لري چي خلیلزاد د خبرو په اړوند په کافي اندازه معلومات نه دي ور سره شریک سوي. که چیري د سولي یوه دومداره معامله غواړو، نو دا کار د افغان ولس له حضوره پرته نه سي ترلاسه کېدلای.» رویا رحماني ویلي ول دا بېره سته چي د امریکا پلان به د جنګ په ډګرونو کي «طالبان لا باجراته» کړي، او د غني پر محاصره سوي حکومت به فشار لا زیات کړي.
پدې خبرو کي هیڅ د تحریف ځای نسته. زما بارو دا دی چي رویا رحماني د حمد الله محب له برخلیک څخه ډارېدلې ده، او اوس غواړي چي خپلي خبري ماست مالي کړي، او په اصطلاح ځان بچ کړي.

د رویا رحماني لپاره پکار دي چي له اوله سره خپلي خبري په احتیاط وکړي. ځکه نن ورځ هر څه ریکاډېږي، او بیا د شاتګ او ریوریس فرصت نه وي.