زما د ژوند تر ټولو لوی نصيحت دا دی چي ” تر کتاب بل ښه ملګری نسته ” او کله چي څوک پوښتنه را څخه وکړي چي ” کوم کتاب؟ ” نو زما جواب دا وي ” هر هغه کتاب چې ورقي لري ! ”.

زما ټالسټای هم خوښ دی او نیچه هم که څه هم دواړه د ځمکي او اسمان رنګه فکري فاصله تر منځ لري خو زما د فکر مرغه دواړه خواه بې خاره سفر کوای سي. زه د قیامت په ورځ د روسو د حرمت ګواهي هم ورکوم او بیا چي روسو ګوښه سي نو زما وجود تر برنارډ لیوي هم قربان دی. د اشتراکي ادب ولې (رګونه) اوس زما په باطن کښي په لویو درختو بدل سوي دي که څه هم د مارکس پر اروا سپور یو ظاهر مزدور هر سهار د خپلي پخوانی مزدوري د ادا کولو تقاضا هره ورځ کوي.

که یو څوک د انسانانو، حیوانانو، ستورو او هغه بلي ” دنیا ” په باره کښي د کوم کتاب فوټو دلته پر فیسبوک پوسټ کړي نو زما د نابغه کمینټ دا رنګه وي چي ” وروره، دا کتاب به په پېښور یا داسي بل ځای کښي له کومه تر لاس کړم؟ ! ”.

هو توبه !، زه یو تاريخ پوهه هم یم. د یونان له اباسین دریابه نیولې بیا د انګلیستان تر امو پوري د هر ماهي (کب) په جنسي، جنیاتي، فکري، ارتقایي او ټولینز تاريخ او مسایلو خبر ” انسان ” یم. چارلس ډارون ما ته په خوب کښي په خپل خواږه غږ د ارتقا په سپینو غوړویو لړلی خپل تور کتاب په وار وار ویلی دی او هم له دې کتابه ما د انګلیستان د صنعتي اوښتون په باره کښي زده کړه کړې ده.

زه هراړخیز ” دانشور ” یم وروه !

___________________________

دوبی هوایی ډګر – د بې منزله منزل په لور !
دسمبر – ۲۰۱۹