نن سبا، د اوربند او متارکې کلمات زیات کارېږي، او د دې لغتونو معنی او استعمال څه جنجال او سوالونه راولاړ کړي دي.

البته، باید زیاته کړم چي اوربند نوې کلمه ده. دونه نوی لغت دی چي حتی نه د پښتو ستر قاموس «دریاب» ذکر کړیدی. نه راورټي په خپلي پښتو ډیکشینري کي راوړی دی. او نه هم محمد ګل خان مومند په خپل «پښتو سیند» کي درج کړی دی.

خو نن ورځ د پښتو ژبي په ادبیاتو او لیکنو کي پراخ حضور لري. او عموما د جنګ او سولي په برخه کي کارېږي.

اور بند د فارسي د آتش بس او د انګریزي د (Cease Fire) سره مترداف لغت دی. اور بند عموما اوږد مهاله وي. زیاتره د جنګ په آخر کي اعلامېږي. او اور بند پداسي وخت کي کېږي چي جنګي اړخونه د سولي درشل ته رسېدلي وي.

خو متارکه عربي کلمه ده. او د جنګي طرفونو موقتي ډز بندیز ته وايي. د پښتو ستر قاموس «دریاب» يې داسي تعریفوي: دوښمني د لږ وخت لپاره ختمول. موقتي روغه. د پښتو- انګلیسي قاموس يې د انګریزي له (armistice, truce) سره مترادف ګڼي.